Kiszyni
kapusty.
Na Śląsku
kapusta miała wielki powodzyni we kożdej kuchni. Warzono ją i rychtowano ś ni
roztoliczne jodła na beztydziyń i od świyta. Bezmała już we XV wieku bola lona
fest rozpowszechniono w naszych stronach, a uprawio sie jom łod 2500 rokow
przed naszom erom – toż idzie pedzieć, że je ta kapusta z ludziami od
niepamiyntnych czasów. Trocha nieskorzij, kieryś mądry człowiek wynokwioł, że
idzie jom kisić i wtynczas poradzi łona łobstoć na dłogi zimowy czas, a jeszcze
ku tymu mo wiela witamin, ze kierych nojważniejszo je witamina C. Tako niyzakiszono
kapusta ludziska stosowali tyż na roztomańte okłady, wtynczas trza jom boło rozkulać
nudelkulom, abo potrzaskać tłoczkiym i prziciść do bolącej szłapy, abo krziża,
a odyjmowała wiela boleści. Bezmała kapusta nojleszy kisi we październiku.
Nojgibcij na świyntego Michała 23 września, a najnieskorzij do Wszystkich
Świyntych, bo potym już boła łona niychersko i sie psuła. Niż zaczyno sie kisić,
trza boło narychtować beczka. W nikierych chałpach rychtowano wiyncyj takich
beczek, eli familijo boła liczno i boło tam moc bajtli. Beczka trza boło dobrze
wyparzić wrzawom wodom ze sodom. Wody nalywano wiela razy, coby ta beczka
napynczniała i niy przepuszczała wody. Nikierzi wciepowali do ni wrzawy kamiyń
i jak sie robiła para, naciepowano na ta beczka pora dekow, coby ta para w
pojstrzodku została i zarozki niy uciykła. Nikiere baby na końcu jeszcze
pociyrały ta beczka przekrotom cebulom. Tak przirychtowano beczka czakała aż do
drugigo dnia, bo rychtowani kiszonej kapusty to boła wielko robota i trza jom
boło napoczynać od rana. Toż od rana płokano ta kapusta i wyciepowano ś ni te
wszystki szpetne, nagnite liści, a potym już trza boło rychtować waszpek do mycio
szłapow i szare mydło. Tyn, kiery deptoł kapusta musioł fest dobrze wyszorować szłapy,
coby niy boło na nich żodnego marasu i jak to padają, coby bakteryjo sie na
nich ześlizgnyła. Przi tej robocie boła cołko familijo i boło przi tymu wiela
błoznowanio. Jedni myli szlapy , inksi rychtowali szmata do uciyranio, a
jeszcze inksi lecieli po maszynka do krążanio kapusty. Tako maszynka boła
czasym jedna na cołko wieś, toż chodziła łona od chałpy do chałpy i trza boło
tak naszykować dziyń kiszynio kapusty, coby
inkszym tyż to spasowało. Maszynki boły najczynścij na kurbla, toż jedyn musioł
kryncić tom kurblom, ale i tak sie aż tak niy narobioł, jak tyn , co kapusta
deptoł. Deptały bajtle, abo tatulek, bo mieli dużo siły, a tego deptanio boło
moc. Eli kapusta deptały baby to nakłodały na głowa chustka, coby do pojstrzodka
niy naleciało szkutow, a byli tyż i tacy, co deptali ta kapusta w czystych
guminiokach. W osobnym kasliku bola narychtowano sol i kmin. Jak sie nasuło
piyrszy szub tej kapusty, to sie jom przesuwało solom i kminym i tak naokoło aż
pod wiyrch tej beczki. Przi tymu deptaniu musioł z tej kapusty wylazować tak
zoft, z kierego potym zrobiła sie kwaska. Pod koniec , jak już boło wiela tej
kapusty w tej beczce, nikierzi dokłodali tyż jaki głomb , czyli tyn pojstrzodek
ze kapusty, bo bajtlom to fest szmakowało, nikierzi wciśli tyż tam pora całych
głowek na gołąbki, a nikierzi tyż dokłodali kwaśne płonki, bo to tyż fest bajtlom
szmakowało. Jak już boło moc kapusty w beczce i na wiyrchu boło szykownie tego
zoftu na kwaska na wiyrch styrkało sie dynko, czyli taki dwie deseczki
przekrote bez poł, a potym kamiyń, coby dobrze ta kapusta prziciść. Beczka trza
boło przikryć czystym konskiym płociynnej chadry, coby do pojstrzodka niy wpod
jaki chrobok, abo inkszy maras i potym kapusta stoła w ciepłym miejscu pora
dni, coby puściła. Co pora dni trza boło syjmować z wiyrchu piany, kiere sie na
ni robiły, coby sie niy popsuła i pleśń,
coby niy sczerniała i niy boła do wyciepano. Trza jom tyż boło co pora dni przeżgać
jakim bodziokiym, abo inkszym szpikulcym, coby ś ni gazy ślazły. Dycko przi
tymu myło sie tyn kamiyń i deseczki we wrzawej wodzie. Jak sie już ta kapusta
wyburziła trza jom zajś boło przikryć czystym płotnym i zaniyść do piwnice, kaj
boło zima. I tak poradziła ta kapusta stoć cołko zima, a jak prziszła Wielkanoc,
to reszta kapusty styrkało sie do krauzow i trza jom boło zawarzić, bo to już boło
za dłogo w tej beczce. Ze kiszonej
kapusty szło robić moc roztomańtych maszketow, na tyn prziklod ciapkapusta,
czyli tako kapusta ze ziymiokami, surówki roztomańte ze marekwiom, cebulom, płonkom,
kiere pasowały nojbardzij do karmidlow i jajec sadzonych, kapuśniok i wiela
inkszych jodłow. Kwaska boła dobro, coby
sie łobronić przed rymom i kuckanim i lyczyła żołądek. Kiery jodoł wiela
kiszonej kapusty, niy boł bachraty, bo łona pomogo schudnyć i niy dostoł tak
wartko raka, bo bezmała tyż pomogo sie przed nim łobronić i nojważniejsze, że
je dobro. Ludzie godali, iże lepszy swoja kapusta, niż cudzo gynś tusto i mieli
recht.
Komentarze
Prześlij komentarz