Tak bywo z chorobami

 

                  Tak to bywo z chorobami.

 

Spytejcie sie yno Fridy jak sie dzisio czuje, a zaroz wom powiy wiela lot choruje,

o tym, że już miała ze sztyry zawały! Rok życio i zostoł- dochtory padały.

I jak rojmatyka szłapy i wykrziwio. Że żyje, to aże dochtory sie dziwiom!

A na łoczach Fridzie zaćma sie robiła, choć chodziła w brelach- to sie pogorszyła!

Na dokłodka niy śmi już se zjeść bombona bo mo tyż cukrzica- tako utajono.

A z rynkami co mo tyż za korowody- niy śmi solić zupy i pić zimnej wody.

Udychać tyż ciynżko, to astma być musi. Jeszcze sie na spaniu nom Frida udusi!

Łod niedowna doszły wrzody na żołądku- tego niy wylyczy nigdy do porządku !

Z żołądkiym sie Fridzie wątroba zacino i musi jom lyczyć sztyjc rapacholinom.

Bez przerwy boleści, bez przerwy choroby, jak niy jaki drapszajz to zaroz ból głowy,

jak niy jaki łupiyż to fonsok docino. Aż prziszła do Fridy somsiadka Gajdzino.

Gajdzino niedowno tyż chorob fol miała, ale naroz cudym ich powylyczała.

Teroz prziszła Fridzie porozprowiać o tym, jak to łoroz prziszła do zdrowio z powrotym.

Wyczytała łoto w jednym ogłoszyniu o pewnym przedziwnym,tajymnym zdarzyniu.

Jednej taki babie kole Raciborza roz sie ukazała sama Matka Bożo.

I tak do ni godo: "Bydziesz ludzi lyczyć, a łoni ci za to sie majom łodwdziyńczyć"

Łod tej pory kogo baba pomacała, to zarozki zdrowiy jymu prziwracała.

- Jo tyż zajechała fort ku Raciborzu i ni mom już Frido żodnych boli w krziżu,

ani katarakty, ani zatwardzynio. Takigoch dostała naroz łozdrowiynio!

A co ludzi było u tej mądrej baby! W siyni zapełnione były sztyry ławy,

kożdy kto piniądze ciepoł do koszyka chnet mioł wylyczony rak i rojmatyka.

Jechała tyż Frida do uzdrowicielki, szukała- jak wiycie Raciborz je wielki.

Szukała, pytała, a znojść niy umiała. Coż to za pierdoły Gajdzino godała?!

W końcu listonorka, co sie jom spytała, pedziała, że baba downo wyjechała,

cyganiła ludzi, że ich wylyczyła, zebrała piniądze i sie wykludziła.

Przijechała Frida nazot z chorobami, ale jednak rado, bo w kapsie z piniądzami

i z tom satysfakcjom, że sie niy nabrała czuła sie tak raźno, że...aż łozdrowiała.