W rajza po skarb
Jak yno zaczynają sie feryje zarozki i bajtle i wielcy
myślom o dalekich rajzach. Ci, kierzi majom wiyncyj w kabzie mogom wybrać sie
fligrym na jaki rajski wyspy za sztyry morza, a zajś inkszym muszom styknyć
wywczasy pod starom dobrom gruszom. A kaj bez lato razowali nasi prastarziki?
Niykierzi tyż zwiydzali daleki krainy, ale boli i tacy, co wybiyrali się do gor
coby szukać skarbow, kierych we skałach skryły diobły i inksze szprytne stwory
przed ludzkimi łoczami. Tam, we ciymnych zapadlinach i pod ziymiom wachowały
tego złota. Myślicie mono że to som yno bojki? Ale, kaj tam! Nojczynścij
wysznupować skarbow wybiyrały sie nasze śląski i słowacki grubiorze, kiere
miały doświadczyni w kopaniu pod ziymiom. Niż taki sznupok złota zajechał na koniu,
abo i zaszoł piechty we Karkonosze, abo w bardzij niebezpieczne Tatry, piyrsze musioł
se narychtować roztoliczne klamory, jak na tyn przikłod świyncono kreda,
sznorek naszmarowany wynżowym sadłym i żołciom szczuki, magnes, kiery pokazowoł
kaj iść, gromniczno świyczka, loretański dzwoneczek, co łodganio wiatry i rozmańte
pisma z zażegnowaczkami, coby diobły łodegnać. Miejsce, kaj dioboł skroł złoto
szło poznać po tym, że niy rosła tam trowa,
naokoło czuć boło siarkom, a jak człowiek tam stanył zaroz szkuty mu ze
strachu zaczyny tyczeć, a serce prało jak łopyntane. Po drodze trza boło uważać
coby niy napotkać Żmoka podanego do kury, abo Groglica, kiero zbijo w lesie, na
łąkach zajś Połednicy i małego diobołka Jaroszka. Złotych rud wachowoł
Permonik, abo jeszcze gorszy, som Rubecal, kiery Karkonoszami rządzioł.
Prawdziwy sznupok skarbu niy wylynkoł sie jednak diobłow, ani wysokich skał.
Toż pamiyntejcie, jak bydziecie latoś w gorach to zajrzijcie na kamiynie, a
mono ujrzycie tam jeszcze jaki znaki, kiere wydziyrały na nich sznupoki.. A jak
już taki znak znojdziecie, a kole niego miejsce, na kierym niy rośnie trowa,
ani stromki, obroćcie sie sztyry razy na piyncie i powiydzcie głośno tako
zażegnowaczka:
„Zażegnowom cie skarbie
zażegnowom cie przeklynty kruszcu
nakazuja ci dziuro diobelsko
cobyś sie zarozki odymkła.”
Komentarze
Prześlij komentarz