Hasiokorze
Przidzie dzisio Richard sznupać po hasiokach,
tych ,co sztyry stojom tu - przi familokach.
Podźwigo śnich dekle i łodegno koty,
potym sie zabiere wartko do roboty.
Piyrsze drobne oszkrabiny i inksze abfele
pocofo na boki i troszka przebiere.
Konsek wosztu i prezwosztu- to do miecha wsuje,
galoty i westa - O!westa pasuje!
fusekle- te schroni, flaszki - do sprzedanio,
konsek jakiś deki - przido sie do spanio,
cajtongi - pozbiyro, yno ślydź ś nich ściepnie.
Ślydź je fest smrodlawy - toż to go wyciepnie.
Dwie czopki - te schroni, stary szrank - łobejrzi.
I coż jeszcze Richard we hasioku zejrzi?
Stare radio - je bez lampy, jakoś babsko keta -
ta keta sie przido. O!Je cygareta!
I kołki som przi ni! Szczynści dopisało,
je tu dużo rzeczy co mu sie przidały.
No i żymły suche i złom - tego szuko!
Złom se sprzedo Richard i zjy żymła sucho.
Jakiś cycychalter - to sie przido Fridzie.
O!Pora bezdomnych ku hasioku idzie!
Trza wziąść nogi za pas, bo jeszcze co zbierom.
O! poznowo Hynia, śniego to je pieron!
Jeszcze by go zeproł i wytargoł złom,
już lepszy Lomijać takich, jak je łon.
Zbiyro Richard miechy na wozyk i idzie,
jeszcze musi towor sprzedać i grosz prziniyść Fridzie.
Komentarze
Prześlij komentarz