Wielki warzyni
Rychtuj synku do Wilije bo
już gwiozdka blysko,
złotym blyskiym topi serca
i łoświytlo wszystko.
Rychtuj wartko łobrus,
swiyca! Piyczcie muter ryba,
bo Dzieciątko już do łokna
klupie w ciymno szyba.
Najgorszy z bajtlami je
dycko do połenia we Wilijo. Przecyż już dycko starzi ludzie godali, że jak
łojce ryczom po swoich pociechach w tyn dziyń to potym już bez cołki rok bydzie
yno jedyn butel w doma, jedne wadzyni i nerwowani. Ja, dobrze sie tym starzikom
godało, ale jako tu niy ryczec jak sie mo szejść synczyskow i to tak łokropnie
zmierzłych jak u Gruchlikow z Cyntnerowca. Loboga, coż to boły za synczyska utropione! Niy boło dnia żeby
co niy napochały! A to prziszły uciaprane z wiyrchu na doł od marasu, a to po
stromach skokały, a to zajś poprały sie z bajtlami od somsiadow. A już
najgorszy boło z lontami, sztyjc prziszły w potarganych na konski galotach.
Boroka Gruchliczka już se z tym ficowaniym rady niy dowała. Nojwiyncyj galot
natargali Leuś i Pieter, rychtyg nastyc niy szło. Aż w końcu Gruchliki gynau
przed świyntami wpadli na knif.
- Domy tym dwom łorgolom
uszyć skorzane galoty, takich niy przetargajom choćby niy wiym co. – wynokwili.
We Wilijo do połednia
Gruchlik jak kożdy gospodorz łodbywoł gadzina we chlywie, a zajś Gruchliczka
warziła moczka i mloła mak na makowki, bo z tym je dycko dużo roboty. Toż żodyn
tam bardzo za tymi bajtlami niy zaglondoł, yno jak sie co mamulce, abo
tatulkowi spomniało to ryczeli;
- A prziniyś tam Franciczku
drzewo pod ruła!
Abo:
- Rudolf narychtuj kibel
wody kole studnie!
Abo zajś:
- Pieter. Leuś, idźcie do
szopy nabrusić bodzioki, bo za chwila byda ryby
kroć na konski!
Ja, ja , niy pomyślała se Gruchliczka,
że synki zajś co gupigo wynokwiom.
- Loboga, każ som te noże?!
– rykła ze kuchnie za godzina, ale, że żodyn niy łodpedzioł, toż poszła do
szopy zajrzeć jako tam synkom idzie.
- _ Jezderkusie! Wy pierony
łogniste! Wy gizdy utropione! – chyciła sie za głowa jak wlazła do szopy i
zejrzała taki łobrozek.
Pieter siedzioł rzyciom na
tym brusku w nowych, skorzanych galotach, a Leuś kryncioł bruskiym w kołko jak
łopyntany. Na Leusiowych galotach już boły ze zadku wydrzite dwie dziury na połrzidkach,
a z Pietrowych galot już tyż blado rzić prześwitowała.
- Jo wom pokoża! – ściekła
sie Gruchliczka – Ale zaroz do kuchnie i bydziecie zy mnom warzić, bo już dycko
starzi ludzie godali, że takim łorgolom to yno roboty dodać, a kustu ująć. Leuś
narychtuje kompoty i piernik na moczka bydzie kroć na konski, a Pieter pokreje
żymły na makowki i bania łoszkrobie na kompot, bo wiycie, że ku rybie musi być
dużo picio!
I tak zagoniła łobuch do
roboty, a sama jak yno skończyła brusić te bodzioki zaczyna kroć ryby na
konski, solić ich za rajom, toplać w mące, jajcu i w tartych żymłach. Potym
prziszoł dran na makowki. Toż toplała zajś Gruchliczka żymły w słodkim mlyku i
posuwała uwarzonym pomlotym makiym ze mandlami i rudzynkami. Jak yno Pieter
łoszkroboł bania pokroła jom na konski, zaloła wodom z łoctym i nelkami i
nawarziła cołki gorniec kompotu. Leuś już fyrloł do kupy piernik z jabczanymi i
gruszczanymi kompotami, suł do pojstrzodka śliszki, kroł pasternak, po
konściczku jarziny, cukrowoł, suł rudzynki i inksze maszkiety, a na koniec
moczka pokosztował i łogromnie mu szmakowała.
Terozki chycili sie za
zupa. Gruchliczka warziła dycko dwie skuli swojego chłopa, kery boł z chałapy
nauczony jeść siymieniotka, a zajś we chałpie łod Gruchliczki dycko jodali żur
ze głow łod ryb. Że żodyn niy chcioł popuścić, toż u Gruchliow w doma kożdy jod
tako zupa jako mu bardzij szmakowała. Pieter i Leuś naszkrobali ziymniokow, a
mamulka przistawili na blacha kwaśno kapusta. Nareszcie wszystko boło uwarzone,
mamulka piykli karpie coby boły ciepłe, a synki rychtowały bioły łobrus, pod
kiery wraziły portomok, coby nigdy w doma piniyndzy niy brakowało, uklodały
terinki, szolki, talyrze, widołki i noże, na pojstrzodku ułożiły krziż,
świyczki i opłatek.
Wszystki bajtle wyglądały
piyrszej gwiozdki, bo na dworze zaczyno sie pomału ćmić, a te ryby pyrszczały
na tygliku i woniały sromotnie, toż kożdego łokropny głod chytoł. Nojbardzij
doczekać sie niy poradzioł na ta rybka nojmyjszy Paulek, a że jeszcze za dobrze
niy godoł, toż yno przedeptowoł kole tej blachy, a powtorzoł;
- Mamulka dać pypka,
mamulka dajom pypka.
- Zabiercie na chwila synki
Paulka, aż skończa – nerwowali sie mamulka – to zarozki bydymy siodać do
wieczerze.
Ale synki, jak to synki,
dugały sie przi tymu łoknu, szczypały, abo chichrały sie niy wiedzieć czamu, a
mały Paulek zjaś dali yno przedeptowoł kole tego tyglika. Aż tu narozki jak
mamulka syjmowali praje jedyn konsek wrawej ryby warzechom, to rynka im sie
jakoś przekrziwiła, a ryba spadła praje na Paulkowo glaca.
Loboga! Coż to sie robiło!
Jaki larmo, jaki butel przed samom wieczerzom ! Paulek ryczoł jak łopyntany,
mamulka mazali mu ta glaca fetym , tatulek na nia chuchoł i dmuchoł, synki
mazały go zajś zimnom maślonkom, a wszystko nic niy pomogało. Paulek ani niy
chciał siodac z familijom do wieczerze, Szmak na ryba mu łodeszoł. Dziepiyro
jak po wieczerzy wszyscy poszli pozaglądać co im tam Dzieciątko nakładło pod
chojinka pocieszoł sie trocha bombonami i drzewianym autokiym na kolorowych
kołkach.
Komentarze
Prześlij komentarz