Przejdź do głównej zawartości

Pieśniczki - Kaśka


Pieśniczki - Kaśka
wykonuje zespół Jastrzymbioki

I
 Jedna Kaśka dość niechersko
po placu lotała,
a tam chopcy w bala grali,
to sie im dziwała.
Ref. Kaśka, Kaśka
kup tym chopcom flaszka,
jak sie na co przidosz,
to sie mono wydosz.
II
Roz wylazła Kaśka na plac
w rynce flacha miała
i tom flachom przed łoczami
chopcom szelontała.
Ref.
. Kaśka, Kaśka
dej tym chopcom flaszka,
jak sie na co przidosz,
to sie mono wydosz
III
Miała Kaśka już galana,
gryfny boł i sztramski,
ale zamiast swoji lipsty
bardzij cynił flaszki
Ref.
Kaśka, Kaśka
zebier chłopu flaszka,
Jak sie mu niy przidosz,
wcale sie niy wydosz
I
 Przidź po szychcie Janek,
nazbiyromy janek,
pojadymy se nad woda,
bo pogody szkoda.
Przidź po szychcie Zbyszku,
nacisna do miyszkow,
sznita chleba, flaszka wody,
bo szkoda pogody
Ref.
Klara fest sie miyni,
Dziołchy som w bikini.
Toć, Agata, szkoda lata
idzie ku jesiyni.
Lata mi je szkoda,
bo zwiyndnie uroda,
a mojimu Jorgusiowi
chned osiwnie broda,
II
Przidź po szychcie Krista
posłochomy twista,
a we wieczor kole lauby
bydymy se dżistać.
Przidź po szychcie Hynio
pogoda sie zmiynio,
toż pójdymy na zabawa
a potym na kawa.


Etykiety:

Komentarze

Prześlij komentarz

Gwara śląska najgryfniejsze wlazowania

Kuloki i hajcongi

Jak już przidzie styczyń to praje dycko je bioło za łoknym, aże bioło, autami ludzie niy poradzom wyjechać ze swojich placow skuli śniegu, a kaj człowiek sie yno niy podziwo, lotajom ludziska po szesyjach z roztomańtymi hercowami i inkszymi łopatami i łodciepujom te wielki hołdy. Wszyndzi je gładko i trza dować pozor jak sie idzie we ważnej sprawie na klachy do somsiadki, abo do roboty. A jak je zima w chałpach! Trza hajcować we wszystkich piecach, bo inakszy pazury łod mrozu ulatujom. Jo dycko myślach że nojlepszy sie majom ci, kierzi miyszkajom na blokach, bo dycko majom ciepło, niy muszom sie marasić wonglym, ani wachować piecow, coby w nich niy zagasło, ale ostatnio słysza, że i na blokach ni ma tak blank dobrze, bo bezmała som tam jakiś haje o liczniki przi tych fojercongach. A zajś jak kiery miyszko we swoji chałpie, to musi już na jesiyń sie o wongel starać, a w zimie niy umi se bez żodnej komedyje ponść z chałpy, bo zarozki we piecu zagaśnie i kaloryfer zamiast parzić po puk...
Prześlij komentarz
Czytaj więcej

Starzikowe pszczoły

 Teklin starzik pszczoły mioł, kierym fest, ale fest przoł. W rownej raji hule stoły wele chałpy, a w nich pszczoły. Pszczoły tak starzika znały, że go yno niy szczypały. A w kumorze miodu beczka, pojodała go Tekleczka, przichodzili ludzie ze wsi, bo starzikow miod nojlepszy. Krauza dycko kupowali, kosztowali, wychwolali. Na wilijo roz się miało, w zimie pszczoły w hulu spały. A w wilijo, to padajom, że zwierzynta se godajom, gospodorzi obgadujom, czy tyż dobrze ich futrujom. Ale żodyn niych niy słocho, lepszy gażom zaciść ucho, kto podsłyszy, niy dożyje do tyj na bezrok wilije. Ale starzik chcieli wiedzieć, Jak się w hulu pszczołom wiedzie. Czy go chwolom? Czy mu przajom? Co tyż ło nim se godajom? Po wiliji familijo na pastyrka już się zbiyro. Ale starzik jakoś zwlyko, przeca kościół je daleko, a  we krziżu fonsok łupie, lepszy zostać se w chałupie. Po pastyrce Tekla idzie, a na fol łotwarte dźwiyrze. Szuko łociec, matka, oma, bo starzika ni ma w doma. Aż tatulek szoł ku pszc...
Prześlij komentarz
Czytaj więcej

Przepisy po śląsku - Pikelsznita

Pikelsznita z ajerkoniakiym Pieczymy dwa biszkopty w bratrule – jedyn bioły i jedyn kakaowy. Oba mażymy ajerkoniakiym. Bierymy liter mlyka i warzymy dwa budynie śmietonkowe, mogymy tam dosuć trocha wanilie. Do krymu dodować po troszce ubitego fajnie masła, kierego bierymy kole szterdzieści deko. Sztyjc miyszać, coby sie cfołki niy porobiły. Krym mazać hrubo miyndzy biszkopty polote ajerkoniakiym i trocha po wiyrchu. Jak kiery rod, to może se to pomazać z wiyrchu polywom szekuladowom.
Prześlij komentarz
Czytaj więcej