Kalita i dioboł
Kiedy ciotka Klemyntyna jeszcze dziywkom boła
do jednego dospodorza na słożba chodziła.
Zwoł sie łon Kalita i boł bezbożnikiym,
krziż wyciepoł, zaroł w ziymia i zdeptoł strzewikiym,
ciotce zajś zakozoł chodzić do kościoła,
a łona Kality łokropnie sie boła.
Aż kiedyś w niedziela gardina wiyszała,
naroz jakoś bryczka pod płot zajechała.
Sztyry czorne konie stowajom u bramy
i wysiodo se panoczek piyknie pozbiyrany
w dłogim, czornym mantlu. Lezie do pojstrzodka,
toż wartko Kality leci wołać ciotka.
Wlazuje gospodorz, z panoczkiym sie wito,
a dyć ze strzewika wylazło kopyto.
Zejrzała to ciotka, ślazła do piwnice,
bo tam skryła przed Kalitom kiejś sztyry gromnice
i mało flaszeczka ze świynconom wodom,
toż łapła jom wrtko i leci zajś do dom.
A tam dioboł syjmnył mycka i wylazły rogi,
ciągnie se Kality, już som wele drogi.
- Ratuj moja dusza Pon Boczku kochany!-
- chalace Kalita cołki ubeczany.
Ale dioboł ciągnie wiela sił w kopytach.
- Niy ucieczesz z piekła już panie Kalita!
Wtym ciotka go wodom świynconom skropiła
i praje w kopyto diobelski trefiła.
Lodpadło kopyto, śleciało na zola,
a dioboł zaryczoł i uciyk bez pola.
Oddychnył Kalita i
ciotce dziynkowoł,
bo kieby ni łona
porwoł by go dioboł.
Sztyjc potym już rzykoł od tej strasznej chwili,
a ludzie kopyto do stroma przibili.
Już dycko wisiało se na starej sośnie
i wisi po dziś dziyń, eli strom tam rośnie.
Komentarze
Prześlij komentarz