XIV Zigusiowe interesa.
Ziguś Kryka boł człowiekiym zaradnym i łobyrtnym. Bestoż bez cołki życi ciągło go
do robiynio roztomańtych interesow. Dycko chcioł dorobić sie wielkich pijyndzy,
coby kiejś wystawic se wielucno chałpa, kaj mog by gorzołka za szynkwasym
sprzedować, na cyji grać ludziom, a nojlepszy by boło, jakby na postrzodku izby
piykne dziołchy do jego muzyki tańcowały w takich kolorowych cycychaltrach i
przigadowały mu jaki je ś niego sztramski karlus.
Ja, taki szynk prziciągnyłby wszystkich chłopow z
roztomańtych dziedzin, a łonymu by to przisporziło bogactwa i bołby u wszystkich
w zocy. Coby jednak tako tańcbuda mieć, musiłby sie piyrsze jako inakszy
dorobić, bo jego geltag z gruby ledwa stykoł na jodło i opłaty, a przeca do
szynku tyż mu sie chciało iść i na jako muzyka wylyźć.
Kombinowoł Ziga, jak koń pod gorka, jako by do pijyndzy
prziść, a jeszcze, coby sie niy narobić i te pijondze przed Wichtorom skryć, a
o Małgoli, to już ani ni ma co godać, bo ta co łapła, to choćby do studnie
wciepoł.
Jak jego piyrszo baba handlowała na torgu, to chcioł, jak to
padajom -na jejim puklu co przidubnyć. Czasym, jak jom zmiynioł na sztandzie,
to na kotlokach jom cyganioł, ale co, jak baba zazdrosno boła o te inksze
handlyry, kierym piyknie przigadowoł i wolała, coby zamiast stoć na torgu,
lepszy jakogo owocu do sprzedowanio natrząsł ze stromow. Czasym kupowała
śliszki, abo płonki łod Blatoniow, bo łoni mieli nojwiyncyj tych stromow. Toż
kozała Zigusiowi chodzić tam łobiyrać owoce.
Jednego razu zejrzoł chłop, że ze stroma, kiery boł blank
blisko Błatoniowej chałpy, idzie fajnie do łokna zaglondać. A tam praje
przeblykała sie Zyta, Błatoniowo cera, kiero kiejś do jednej klasy ś nim
chodzowała. Toż przisiod chłop na gałynzi i zamiast płonki łobiyrać, do tego
łokna yno sztyjc wyzyzowoł.
Coż, kie ujrzała go baba i
i łokropnego larma narobiła, a jak Wichtory na torgu trefiła zarozki
wszystko ji wyklaprowała. Haja mioł Ziga wtynczas łogromno i łod tego czasu
zakozała mu jego slubno na płonki wlazować. Kozała mu potym autobusym wozić te
płonki do Wodzislawio, bo tam miała czasym nojynty sztand, jak boł torg.
Coż, kie jedego razu, jak wioz chłop gruszki , to wysuły sie
łone ze taszow na delowka, kiej tyn autobus na zakrycie sie przechylił. Że
Ziguś siedzioł na zadku, to te gruszki kulały sie do przodku aż ku szoferowi, a
ludziska ich zbiyrały i podowały do zadku, ale co drugo sie straciła po drodze.
I tak zamiast nafolowanej tasze prziwioz Ziga poł tasze gruszek. Baba zajś mu
zrobiła wielki larmo, bo se myślala, że sprzedol ich kaj po drodze, a pijondze
przesmolił..
Łod tego czasu padała, że już nie chce żodnego pomoganio i
Zigusiowi sie kotloki skończyły w kapsie.
Potym zajś wynokwioł inksze ineresa, coby co zarobić. Trocha
pijyndzy zarobioł na swojim psie Łatce, kierego bez pora rokow ludziom
sprzedowoł, a tyn zajś dycko nazod przilecioł, ale jak go Blatoń forom
przejechoł inters się na dobre skończoł. Wynokwioł potym Ziguś, że bydzie złom
sprzedowoł , bo coroz bardzij do gory idzie, a przeca u kożdego na placu jaki
klamory leżom. Piyrsze wyzbiyroł wszystko ze swojigo placu, ale jak zebroł Wichtorze
kopaczka, kierom dycko ploła w zegrodce, baba zrobiła mu tako haja, że wiyncyj
złomu przi chałpie niy szukoł.
Jednego razu zejrzoł przi szesyji wykopane taki studziynki na
deszczowka, na kierych ciynżki, żeleźne dekle leżom, toż uznoł, że nic sie przeca
niy stanie, jak se pora takich dekli wytargo i sprzedo. Zaczon łod tych, co
blisko jego chałpy leżały, bo niy chciało mu sie ich z daleka pryczyć. Coż, kie
zaroz na drugi dziyń do tej studziyki wpod baran łod Fizinej, kierego z łąki gnała ku chałpie, a jak wpod to szłapa se
złomoł i musiała go baba dobić, coby sie niy tropioł. Jak zejrzała Fizino, że
te studziynki dekli ni majom, to tak dłogo lotała po wsi, aż nareszcie ji stary
ożyrok, Stanik Kondziołka poskarżoł, że widzioł jak Kryka brechom te dekle
podważoł. Zarozki tyż poleciała Fizino do Wichtory i sądami zaczyna jom
straszyć, aż boroka baba tak sie wylynkała, że zapłaciła somsiadce za tego
barana. Niy trza już ani dodować jako zajś haja mił Ziguś w chałpie, toż wyncyj
dekli niy wytargowoł.
Chneda potym zejrzoł zajś, że w lufcie wiszom kable na sztrom
i uznoł, że jaky ich tak po konsku poucinać, to szłoby piykny pijondz na tym
zarobić. Wiedzioł, że jak urżnie kable to sztromu niy bydom mieć w doma, ale
przeca w inkszej dziedzinie - czamu ni? A mioł
Ziga wielki nerwy na takigo kamrata z roboty, kierymu na miano boło
Wacek Karwik. Inksze chłopy tyż na niego przezywały i godały na niego, że je
lizydupom i pieronym łognistym, kiery sztajgrowi na kamratow skarżoł.
Nojbardzij uwzion sie na Zigusia i sztyjc lotoł na niego z kożdom pioerdołom.
Za to Ziga tak go niy ciyrpioł, że ani zaglondać na niego niy chcioł. A jak
wynkowioł z tymi drotami na sztrom, to mu sie spomiało zarozki o Karwiku i
jeszcze to, iż dziepiyro co asioł sie łon w robocie, że se nowy telewizor
kupioł. „ Już ty na niego niy pozaglondosz” - padoł se w duchu i jeszcze w tyn
som wieczor wybroł sie do inkszej dziedziny, kaj Karwik miszkoł na kole, do
kierego przi zadnim szuzblechu przipion kole kety tako prziczepka ze starych
blachow na tyn złom.
Jak już boł blisko, to podeszoł do łokna łod Karwika i dziwoł
sie jak se chłop rożygnył tyn telewizor i jak cołki rod roztopyrczył sie na
szislongu, coby na niego zaglonać przi bonkawie. Potym Ziga wyjon ze prziczepki
rozkłodano drabinka i zaczon na nia lyźć, coby uszczignyć szykowny konsek tego
drota ze sztromu. Jak yno uszczig z jednej strony to zarozki Karwikowi
telewizor zgasnył, a Ziga łapnył potym kabel i uciyk du dom. Lotol potym Kawik
cołki wieczor od łokna do łokna i zaglondoł, że inksi we wsi majom sztrom, toż
uznoł, że tym telewizor mu sprzedali schacharzony i zaczon po nimu tak prać, że
w końcu go na drobne łograbki rozczaskoł.
Kie mioł Ziga prziczepka przi kole, to jeździoł niom czasym i
złom zbiyroł łod ludzi ze wsi.. Tak boło, aż przijechoł jednego dnia do Any
Wysłochowej, swoji kamratki, kiero kiejś ś nim do szkoły chodzila, a potym jak
sie wydała zaczyna gospodarzić ze swojim chłopym na ojcowiźnie. Ana miała pod
szopom kole chlywikow postawione stare, rozlecane koło po swojimu starziku,
kierego sie pozbyć chciała, toż padała Zigusiowi, coby se go wzion na złom.
Kryka zalecioł po niego z wielkom uciechom, rod, że Ana ni mo czasu ś nim
klaprować, ani po placu go okludzać, bo praje bajtla narodzonego miała. Poszoł Ziga za ta szopka, ale tam
stoły dwa koła – jedne cołki zaruściałe, bez kety, a drugi blank nowe ze
światłymi szuzblechami i skorzanym zicym. Łapnył chłop na złom te nowe, bo se
pomyśloł, że mu wiyncyj za taki szumne zapłacom, a jeszcze w tyn som dziyń, jak
już koło boło sprzedane przileciała Ana z wielkim larmym, że Ziga ji nowe koło
ukrod. Ani niy boło godki, że przeca sama baba mu kozała go zebrać. Ana zrobiła
taki butel, że Wichtora ji musiała łod rynki zapłacić za to koło z tego co
praje uhandowała. Toż Ziga mioł potym w doma jeszcze wiynksze larmo. A
prziczepka, kiero mioł chłop przi swojim kole Wichtora mu zebrała i na torgu
sprzedała, coby już nigdy po złom ś niom niy jeździoł.
Za jakiś czas wynokwioł Ziguś inksze interesa. Mioł przeca za
chałpom garaż piykny, mkurowany, przerobiony z downej szopki, przi kierej kiejś
chlywiki stoły. Prozny boł tyn garaż i yno trocha klamorow w nim zawodzało. Toż
czamu by ni mog sie nadać na co pożytecznego, coby pijondze ś
niego jaki mieć. Bez cołki życi przeca chcioł mieć tako restauracyjo,
coby ludziska tam chodzili gorzołki sie napić, potańcować i na frele piykne
pozaglondać. Kie niy szło zarozki wielkij chałpy wystawić, to i garaż je dobry
coby intersa napocząć. Piyrsze wysnorził w pojstrzodku tyn garaż, klamory
wystawioł ze zadku za winklym , coby ich ze szesyje widać niy boło, łod malyrza
Ericha Szlosarka kupioł trocha farby i łobiylył ściany i łordeka, potym
przinios ze ciaperkuchnie pora stołkow i stoł, kiery zawodzoł na powale. W rogu
ustawioł ławka ze stodoły, na kierej jeszcze stary Kryka downymi czasy siadowoł
i z tej ławki zrobioł szynkwas, a na koniec kupioł pora flaszek gorzoły, coby
ludziska do niego ożrać sie lotali. Namowił swojigo kamrata Bronka Kokota,
kiery rod sie za baby przeblykoł, coby tańcowoł przi cingowej rułce, co jom
kiejś pod beszongym znod, a Ziguś mioł do tego tańcowanio przigrywać na cyji.
We piyrszy dziyń chcioł zrobić Ziguś wielki otwarci, coby klijyntow ściągnyć i
toż gorzołka polywoł za darmo. Roz dwa sie o tym zwiedziało pora ożyrokow ze
wsi i zarozki przilecieli, coby sie tej gorzolki natultać. Wszystko byłoby fest
piyknie kieby ni to, że fest chalatali na Bronka Kokota, bo zarozki zaczyni go
szacować i pedzieli, że ta frela mo jakisik za wielki muskle i wszyscy sie jom
lynkali. Erich Szlosarek, malyrz, kiery tyż prziszoł pozaglondać pedzioł, że
przilkudzi Zigusuiowi Agata Szczypkowo, kiero wszyscy znali, bo dycko za
szekulada, abo za cygareta chłopom w szynku tańcowała. Choć ta Agata boła
łoszkliwo, puklato i świdrato, to i tak wszyscy pedzieli, że wolom na nia
zaglondać niż na Bronka. Coż, kie baba niy chciała tancować w takim małym
szynku wroz z Kokotym, kiery poł garażu sobom zajon, a niy chcioł ani rusz
slyźć z parketa. Szekluda sie Agacie niy zdała
i pedziała, że za taki poświyncyni, to chce dwie halby gorzołki i nowy
klajd, bo jak pedziała, tako artystka niy bydzie w bele czym wystympować.
Skończyło się na tym, że Ziguś wytrzasł łotlano baba ze swojigo lokalu. Na
drugi dziyń, jak już nareszcie wygnoł wszystkich ożyrokow, kierzi do rana niy
chcieli ponść do chałpy zaczon w końcu robić interesa. Toż padoł, że terozki za
gorzłka trza płacić. Jak ożyroki dowiedziały sie, że darmocha sie skończyła, to
już sie żodyn w garażu u Zigusia niy pokozoł.
Wiela rokow nieskorzij, jak sie już Ziga ożynioł z Małgolom
to wynokwił, że bydzie tyn garaż noimoł, toż doł do cajtonga ogłoszyni. Za
jakiś czas znod sie panoczek, kiery chcioł go nojonć na roztomańte byrny,
kable, momyntki, drotki, sztekry i inksze klamory, kiere muszom być, coby
sztrom mieć. I bołby Ziga w końcu
pijondze mioł na tym garażu, kieby ni to, że synki od Małogole po leku wszystki
klamory kajś wyforowały. Traciło sie wszystko jedne za drugim, choć Ziguś proł
sie w piersi, że przeca drugigo klucza do garażowych dźwiyrzi ni mo. Panoczek w
końcu łokropnie się znerwowali, poczyni Kryki sądami straszyć, a za jakiś czas
zebroł reszta klamorow i jeszcze Zigusia łobgodoł po cołkij wsi, że je złodziyj
i chcachor i łod tej pory żodyn wiyncyj u niego garaża niy chcioł noimać.
Jednego razu zajź wynokwioł Kryka, że przeca na wiyrchu dwie
izby mu stojom wyrychtowane, a prozne.
No, mono ni aż tak wyrychtowane, ale w jednej jeszcze blank dobry stary pryk po
starce stoł i szrank jeszcze za starej Polski kupiony. Toż czamu by tego niy
nojonć za piykne pijondze. Jak Wichtora jeszcze żyła, to słyszeć ani o tym niy chciała, bo
dycko miała w pamiynci, jak jeji łojcowie jeszcze żyli i tyż noimali izba
jednej familiji, kiej łona jeszcze bajtlym boła. A potym, jak się jejich
nojstarszo cerka wydowała, to chciała z chłopym w tej izbie miyszkać, ale tej
familije niy szło sie nijak z chałpy pozbyć. A jak mamulka chcieli ich z chałpy
wytrzaść, to baba jom przeklyna i wszystki jeji bajtle, a potym to sztyjc jakiś
sromoty skuli tego mieli. Piyrsze tatulek wczas umrzyli, choć jeszcze Abrahama
niy dożyli, potym chłop od tej nojstarszej cerki zrobioł bajtla Tekli, kiero z
roztomańtymi sie zadowała i z chałpy poszoł, potym zajś młodszego bracika
choroba ścisła i wrzod go zaczon łobrożać. A na koniec boło jeszcze gorszy i
skuli tego Wichtora zarzekła sie, że łona nigdy żodnymu swojich izbow niy
bydzie noimać.
Dziepiro jak baba umrzyła zaczon Ziga noimać izby na powale
jednymu karlusowi, kiery na kryka żoł z Tilkom Ostrzołczynom i skuli tego
ludziska krziwo na niego zaglondali. Zigusia to niy szterowało, stykło mu , że
pijondze mu płacili. Coż, kie tej Tilce niy szło wygodzić z tymi izbami. Sztyjc
halatała, że ściany som krziwo wymurowane i ani łobrozka niy idzie na nich
prziwiesić, że kromlojter z łordeki ślatuje i bez to byrny sie trzaskajom, że
na dźwiyrze trza zaciągaczka wiyszać, bo za nimi wieje, a z piecyka z ruły
sztjc sadze sie kopcom, bo kumin je krziwy i co zawieje, to luft nazod cofie.
Ziguś tuplikowoł gupi babie, że przeca to ni kumin je krziwy, a Meluzyna w nim
rajcuje i jak wiater zawieje, to tymi sadzami suje po izbie, a kromlojter ni
dziwota, że ślatuje, jak na pryku tak z karlusym wyrobiajom bez cołki noce,
zajś ściana łod downa stoji i jeszcze sie przeca niy łobuliła. Ale baba yno swoji i skuli tego jejigo
jaszczynio, tyn karlus przestoł Zigusiowi pijoindze płacić. W końcu wytrzasł
ich Kryka z izbow i pedzioł, że kaj indzinj se majom grzeszyć, a ni w jego
chałpie, bo łon je chłop bogobojny i pobożny jak mało kiery.
Potym jeszcze te izby noimoł Hubertowi Figasowi, kierego jedyn
gospodorz od siebie wytrzas, skuli tego, że ze wszystkich rzeczy na świecie
nojbardzij niy rod boł mydła oglondać, a ku tymu, niy rod tyż sie strzigioł i
golił, skuli czego ludziska mu wampir godali. Chłopa tego jeszcze z daleka
widać niy boło, ale już go boło czuć. Zigowi to niy zawodzało, a znerwowł sie
dziepiyro, jak Hubert po miesiącu pomiyszkanio pedzioł., że łod downa roboty ni
mo, a w hasiokach bardzo pijyndzy znojść niy idzie, toż płacić ni mo razinku z
czego.
Wtynczas tak sie znerwowoł Ziguś Kryka, że pedzioł, iz
żodnych interesow niy bydzie już wynokwioł i lepszy konsek choćby bele jakij
roboty, niż taki wynokwiani, jako by tu do pijyndzy prziść.
Komentarze
Prześlij komentarz