Utopiec Rympa
Utopiec Rympa i niedźwiedź
Tam, kaj rzyki fale gnały
koła młynow sie zwyrtały,
bulko woda pod kołami,
idzie ludzi moc z miyszkami.
Zwyrtu, zwyrtu, koło miele,
bydom chleby na niedziele,
bydzie biołej mąki moc.
Poszli ludzie. Idzie noc.
Bulko woda, gyrglasuje,
kieryś z rzyki wylazuje
i do młyna wartko kroczy.
Sierść zielono, żabi łoczy
i kopyta zamiast szłapy.
Ciepie młynorz mu na łapy
Zboża, mąki biołej tyż.
Czy to człowiek? Czy to zwiyrz?
To utopiec Rympa prziszoł.
Je w noc kożdo, je i dzisio.
Na delowce, tam, kaj stanie
szlom i woda sie łostanie.
Jak marasić łon tak może!?
I wychciywo jeszcze zboże!
Choć chalace młynorz fest,
to duch wodny przeca jest,
totyż gorszyć go niy może,
już mu lepszy dować zboże.
Ale roz ktojś bez dziyń klupie.
-
Czy je młynorz we chałupie?
Joch je Cygon, stary Tarka,
co sztyjc chodzi po jarmarkach
i niedźwiedzia z sobom wodzi.
Przipion żech go sam przi wodzie.
Szukom izby na noc dzisio,
toż żech do wos z prośbom
prziszoł
i zapłaca wom młynorzu.
Jutro pońda z łaski bożyj.
-
Dobre, podźcie mój Cygonie-
pado młynorz spać se do mie.
No i rychtyg, prziszoł wieczor,
piyrsze łogrzoł sie przi piecu,
zjod wieczerzo i szoł spać.
A tu Rympa prziszoł zajś.
Włazi du dom, szlom sie leje...
naroz...kieryś tam szaleje,
cojś tam ryczy kole rzyki,
słyszeć kroki niedaleki.
Chlasnył łapom z pazurami
niedźwiedź Rympy pod dźwiyrzami
i roztargoł futro fest,
bo łokropnie ściekły jest.
Leci Rympa flot ku wodzie,
a zwiyrz za nim i go bodzie
fest łostrymi pazurami,
głośno kłapie zymbiskami.
Rano wzion niedźwiedzia Cygon
i na inkszy jarmark idom.
Bulko woda pod kołami,
idzie ludzi moc z miyszkami.
Godo młynorz wszystkim ludziom,
że utopiec sie wykludzioł,
niy pokozoł sie już w wodzie.
Mo dlo siebie młynorz zboże
i majątku sie dorobioł
łodkąd niedźwiedź Rympy pobioł.
Komentarze
Prześlij komentarz