Czasym diobły sie przydajom

Czasym diobły sie przydajom

Czasym diobły sie przidajom.

Wiycie, terozki na świecie,

to aut tela niy znojdziecie

wiela kiedyś diobłow boło,

jako ludzi moc kusiło .

Kole dobłow- tych łokropnych

boło mocka myńszych, drobnych

wodnych, leśnych i kudłatych,

blank ryszawych, takich w łaty,

a nojwiyncyj czornych fest.

Teroz to ich mało jest

bo ich ludzie niy wołajom.

 Kiejś to czynsto sie godało :

„ Ach do czorta!”, „Ach do dioska!”

 – i już dioboł mynczoł wioska,

abo chałpa sztyjc nawiydzoł

i śnik z powiek ludziom spyndzoł.

A boł taki Jorg Watoła,

co sztyjc yno pioł gorzoła.

Choć padajom, że we flaszce,

we kieliszku, abo w glasce

kaj gorzałka na dnie leży

 czorny dioboł [kto chce wierzi],

to niy widział go tyn Jorg.

Pioł gorzałka cołki rok!

A mioł  baba piykno, miło,

 życi fest jom doświadczyło

przi pierzińskim ożyroku,

co boł krzyźby roz do roku.

Aż padała w końcu: „Dość !

Dom jo ci pieronie w kość! „

I oblykła kożuch krympy,

na kark dała dwie knisztrymfy

i fuzekla czorno wziyna

i zrobiła ś ni czupryna.

Troszka słomy, gutaliny,

krymy, piyrzo ze pierziny

i z momyntki łogon dłogi.

Poszła na rozstajne drogi

wele karczmy i tam czako

choćby czorno mara jako.

Jak zawrzili karczma w nocy

Jorg ożarty du dom kroczy.

Naroz widzi ktojś tam stoji,

stanył chłop, bo fest sie boji.

Dyć zaglondo- czorny dioboł,

rogi, kożuch, dłogi łogon.

- Ty pierziński ożyroku!

Już powiesza cie na hoku!

Zrobia zaroz tu fojera

i ze skory cie łobiera!

Byda cie widłami bod,

a ze skory zrobia hut

i pochwola sie kamratom,

że to z ciebie! Coż ty na to?

Podyndź bliżyj pora krokow,

co naboda cie na hoku!

- Jezderkusie !- ryczy chłop

- Każ tyn dioboł mie tu znod!?

Zlituj Boże sie kochany,

wiym żech dzisio je naprany,

ale łoszczyndź życi, prosza,

a już nigdy Cie niy zgorsza

i gorzołki sie niy chyca.

Jutro byda siyk pszynica,

a pojutrze ciepoł gnoj,

yno łoszczyndź Boże mój!

Wtedy cofnył sie tyn dioboł,

a Watoła lecioł do dom.

I tak wartko du dom gnoł

choćby skrzidła jaki mioł.

Flot wykrzyźbioł, rzykoł fest.

Teroz chłop porządny jest!

Starzi ludzie powiadajom:

Czasym diobły sie przidajom.