We rży

We rży.

Tam lyg we rży mój chłopeczek
kaj boł bioły Anioł
i zaglondoł se na chmury
jak wiater ich zganioł.
A jak prziwrzoł swoji łoczka
reż mu się kłaniała
i sie schylył bioły Anioł
a joch zaglondała.

Jak szli se tak łoba w kupie
rynkom do mie kiwoł
a mie serce bardzo prało
boch je przeca żywo.
I klynkałach wele ryczki
ślimcąc Pon Boczkowi.
Niech moj chłopek Go łodymie
fest piyknie pozdrowi.




Pieczkowo

Pieczkowo mo przilepiono do wargi cygareta,
przebiyro aszynbecher, sprzedano łostatnio keta.
–Biercie te bajtle z szesyje, szyjc goniom dziki koty!
Zrobcie im co do jodła i chyćcie sie roboty!
Na blasze prozny garniec, w biksie już cukru ni ma,
w kachloku gore kulok, na sercu sztajfno zima.
Łodkad łodeszoł Gerad ciompa wrosła w zopaska,
Pieczkowo yno kurzi i sztomli mo pełno glaska.
Pieczkowo yno kurzi, uwyndzi swoji sromoty,
a bajtle zbiyrajom płonki pod somsiadowym płotym.