Mody

Jak te mody sie zmiyniajom

Dziwejcie sie,jak to mody ciyngiym sie zmiyniajom
roz sie taki,a roz inksze lonty podobajom.
Moja starka mi godali,że jak dziołchom byli
jedna kiecka yno mieli i dycko nosili.
Starzik,jak byli karlusym-modne huty były
i galoty"zechcingery" chłopy tyż nosiły.
A jak mama była dziywkom sama klajdy szyła
w pasie ciynki,spodkiym szyrsze- tako moda była.
W rokach szejśdziesiontych, jak były hipisy
zaczyny być modne wiyrchym ciynki dżinsy,
a spodkiym szyroki i włosy kudłate,
a koszule w piski,abo blank ciapate.
Jak jo była dziołchom, to wszyscy sie śmioli,
jak mioł kieryn długie galoty do zoli.
Miały być ku kostkom i wąski u spodku,
modne były westy z kapsami w pojstrzodku.
Łoto boły modne "dzwony",sagi łydki
i kiecki,co widać w nich całe połrzidki.
I ktoż by to nastyk za tymi modami
i zmiynioł sztyjc lonty i robiuł se prani.
Jak kieryn je szwoczkom, to jeszcze do rada
i szyje se klajdy taki na parada.
A inkszym bych na to tak zrobić radziła,
coby im z geltasze dużo niy ubyło:
Dzieckom kupić szare i ciymne galoty,
to niy bydzie z praniym za dużo roboty.
Dziołsze krotko kiecka- wyndzie sztofu mało,
synkowi galotki z tego co zostało.
Jak chłop ancug kupi,mo go do pyndzyje,
babie kupić mantel,co klajd stary skryje.
A starce zopaska fleki zatuszuje,
starzik zajś niech westom przikryć ich spróguje.
I tak trzeba radzić jakoś se z modami
i tak chned sie zmiyniom, obeirzicie sami.