Koczka

Zefliczek

Poszoł na łąka roz mały Zefliczek
i w trowce wysoki se straciuł strzewiczek.
Powiydzcie mi ptoszki cojście tu lotały
Czy żejście strzewiczka dzisio niy widziały?
A mono ty w trowce brzynczoncy świerszczyku
wiysz co o mojim jednym strzewiku?
A mono zajączki we trowce kicały
znodły mój strzewiczek i mi go zebrały?
Niy wiy już co robić i ślimce Zefliczek
Kto mi teroz łoddo mój drugi strzewiczek?
Powiydz mi boczoniu mój kochany ptoku
jak jo teroz pójda du dom po bosoku?
Aż tu naroz prziszła siostrziczka Zefliczka
Poszukała w trowce i znodła strzewiczka
Utrziła mu płaczki sznuptechlom ze liczka
Jak dobrze je mieć starszo siostrziczka!

Szprytno koczka

Tam w antryju na bifyju stoji mlyka szolka
czako koczka aż wylezie mama, tata, Jolka.
Jak wylyźli na zegrodka, to koczka skoczyła,
cołki mlyczko ze szoleczki, wartko- chlaps- wypiła.
Prziszła Jolka ze zegrodki, a pić ji sie chciało,
wtym zaglondo, a tu mlyko kajś wyparowało.
Inkszym razym szprytno koczka z kąta zaglondała
jak w niedziela mama miynso w kuchni rychtowała.
W cołki chałpie już woniało piyknie roladami,
ale tata mama woło na film z kowbojami.
Jedna baba do kowboja na koniu strzylała,
a tam w kuchni se rolady koczka wyżyrała.
Jak rodzinka już po filmie za stoł chciała siodać,
to niy było już do klusek i zołzy co podać.

Wiosna

Już cilipy skoczom,
już boczonie kroczom,
gynsipympki biylom sie.
Dyć już wiosna we wsi je!
Rajzowała wiosna dłogo niż sam zawitała.
Na czym żejś paniczko do nos przijechała?
Fligrym ,autym, czy na kole,
niż żejś siadła na stodole?
Kawkom, czajkom, na kokocie
niż żejś czampła na tym płocie?
Ledwoś yno sam przibyła
do roboty żejś skoczyła.
Furgo mietła, kloper piere,
stary Gustel zboże sieje,
Rosnom kwiotka, kwitnom stromy,
śpiywo słowik, nosz znajomy,
bajtle locom, koza żro,
bo już świeżo trowka mo.
W lesie hazok wylynkany
widzi ludzi iść z bojtlami
na majowka, bo przi dece
dobrze sie wosztliki piecze,
dobrze sie wesoło godo
zachwycając się przyrodom.
Być wiosynko z nami sztyjc,
z tobom to nom chce sie żyć,
bo po zimie lisi, bladzi
momy cie wiosynko radzi.

Wiosynka

Na zaprzyngu ze boczonow siadła se wiosynka,
zaśpiywała nom ucieszno, kwycisto piosynka
o winiuszku Maryjczynym, o przociu Karlika
i ludziach urobonych boła ta muzyka,
co pod ziymiom we marasie sztyjc wongel fedrują
i bez cołki rok modrego nieba niy widujom,
ale na wiyrch jak wyjadom w zakurzonych szolach,
zaroz pójdom wiosna wielbić we lasach, na polach.
Żodyn przeca tak jak łoni wiosny niy docyni
co wylezom jak umrzyki ze mrokow podziymi,
żodyn przeca tak jak łoni niy zaprzoł zielyni
i tym kwiotkom , kierach w maju wielko moc sie miyni.