Czarownica
Ujec Feliks, to poradzi opowiadać o przeszłości,
a tak piyknie, że aż bajtlom łoczy locom z ciekawości.
Jak do Klepkow kiedy przidzie bajtle flot ku niymu lecom
i go proszom: „ Rozprowiejcie o przeszłości nom co nieco!”
- Posłochejcie – pado ujec – dzisio powiym wom o babie
co miyszkała sama jedna, niy chodziła do wsi prawie.
Chałpka jeja wele stawu, a w zegrodce dziwne ziela,
co warziła ś nich mazidła, a w zegrodnce jedno ciela.
A to ciela jak jałowka masne mlyko ji dowało,
bo to boła czarownica, co uroki zadowała.
Jak na kogo urok ciepła, palce ropom podchodziły,
spać tyż niy mog, a na gymbie ciymne fleki sie robiły.
Inkszym krowom mlyko brała, bo umiała ich zaklinać,
łod jejigo zajś cielątka taki mlyko, że maśnina
na nim boła aż na meter i śmietonka jak marzyni,
a na hoku wisioł palec łod wisielca w jeji siyni.
Kożdy wiedzioł, ze to wiedźma, dokuczały sztyjc ji dzieci,
a jak wiater wioł, godali, że na mietle łona leci.
Starki wodom jom świynciły, farorz wyklon jom z kościoła,
niy dziwota że ta baba ludzi z czasym fest sie boła.
Jak umrziła w samotności niy poświyncioł truły farorz
i godali, że przibyło wszystkim krowom mlyka zaroz.
Pochowali jom pod płotym w samym rogu na kiyrchowie.
Tak to boło z czarownicom, co zbiyrała ludziom zdrowiy.
No, terozki dejcie dzieci już ujcowi dychnyć trochym,
bo tam fater narychtowoł flaszka i kapusta z grochym.
Komentarze
Prześlij komentarz