Wodne panny
Tam, kaj teroz stojom bloki
kiejś boł stawek dojść głymboki,
a po bokach zarośniony
tatarakiym z jednej strony,
z drugi strony gynste krze
ciyń robiły cołki dnie.
Tam bezmała lato całe
panny sie pokazowały.
Wszystki boły jednakuśki
z wiyrchu na doł blank saguśki,
dłogi włosy, jasne lica
miała kożdo ta wodnica
i śpiywały noce całe,
a czasmi tańcowały.
Jak ich dziołcha tyż zejrzała,
to do roku sie wydała.
Gorszy boło z karlusami,
co trefiły sie z pannami,
bo jak kiery zejrzoł ich
niy łożynioł sie już, ni.
Starka dycko to godali,
że im muter kiejś bojali
o Paulku, synku młodym,
co przechodzioł kole wody
jak z muzyki kiejś szoł w nocy
i ku stawku z drogi zboczoł.
Wroz usłyszoł śpiyw łod wody,
zejrzoł sztyry panny młode
jak za rynce sie dzierżały
i do kupy tańcowały.
Łod tyj pory kożdej nocy
synek zajś nad stawek kroczoł
i łodkozoł ślub z Kornelom,
bardzo gryfnom młodom frelom.
Wcale sie już niy łożynioł,
swoji życi blank łodmiynioł.
Chudy, blady i sztyjc ściekły.
Tak go panny te urzekły.
Teroz prziszły inksze czasy,
tracom krzoki sie i lasy,
stow zasuty, ziela zgniły.
Kaj sie panny wykludziły?
Komentarze
Prześlij komentarz