Bachrato królewna- Po śląsku
Bachrato królewna
Za groniami, za stromami,
za strymi krzipopami
przed rokami tymu wiela
żoł krol z babom.
Mieli cera.
Choć krolewna piykno była
rada jadła, rada piła.
Fet i woszty robiom swoji.
A ku tymu, drodzy moi
keks, bombony, kreple, moczka.
Rynce załomała szwoczka.
Ni ma tela sztofu w mieście,
knefli brakło już wkrolestwie.
Wszystki klajdy popukały,
a strzewiki sie zdeptały.
Krol już ślimce, bo niestety
w mieście kończom sie maszkety.
A krolewna wszystko smoże.
Łoto- zawaliła łoże.
Chned łordeka sie zapadnie,
a królestwo się rozpadnie.
Zawezwano w końcu wróżka,
co je lekko, choćby muszka.
W lufcie furgo jak rakieta,
choć na karku ciynżko keta.
Niech krolewna zaczaruje,
abo myni jom futruje.
Przileciała wróżka chned.
Piyrsze ji wyciepła fet.
Woszty biydnym rozdziylała,
a królewnie tak padała:
- Jak chcesz ksiyncia kiejś zapoznać,
muszą skończyć się te błozna.
Czas gymizom łobsioc pola,
czas na ćwikla i fandzola.
Zamiast krepla -
oberiba,
Zamiast cole – pić pokrziwa.
Wiedziom przeca wszystki dzieci
- jysz gymiza – woga śleci.
Toż nakozoł krol kuchrce,
niech umyje wszystki garce,
bo krolewna mo sam dieta,
niech niy spomni o maszketach.
Wszyscy warzom łotąd chudo.
Czy sie schudnyć dziołsze udo?
Za groniami, za stromami,
Za strymi krzipopami
Żoł krol rokow tymu wiela,
Co mioł baba i mioł cera
Piykno, wiotko, choćby wróżka
I podano do Kopciuszka,
Kiery wydoł się za ksiyncia.
A krolewna je do wziyncia.
Toż karlusy stojom rajom
i sie o nia ubiegają.
Wszysto dziynki jeji diecie.
A co dali, to już wiycie.
Komentarze
Prześlij komentarz